“Mwanafunzi wa mganga wa kienyeji” – nyakati za wamishenari

Erasto Simon na Victoria Davidi Chichango

Nilizaliwa nchini Tanzania. Baba yangu alikuwa Shehe, mjomba wangu alikuwa mganga wa kienyeji, na mimi nilikuwa mwanafunzi wake. Familia yangu yote ilikuwa ya Kiislamu, na kukubali kuwa Mkristo kulionekana kuwa kosa kubwa kabisa la kumkufuru Mungu.

Siku moja, mhubiri mmoja alifika katika kijiji chetu. Ushuhuda wake ulifanana sana na maisha yangu, kwa kuwa naye alikuwa ametoka katika uchawi, uganga wa kienyeji na Uislamu, kama nilivyokuwa mimi. Alizungumza kuhusu Yesu anayewaondolea watu mizigo yao. Nilijua nilikuwa nimelemewa na mizigo ya maisha, lakini sikuwa nimepata msaada. Nikaamua kujaribu kumjua Yesu.

Niliporudi nyumbani na kuwaeleza wazazi wangu nilichokuwa nimefanya, walinifukuza nyumbani. Hawakuniruhusu hata kuchukua nguo zangu.

Kwa siku kadhaa nililala sakafuni katika shule ya msingi ya kijiji, mpaka rafiki yangu Mkristo aliponiona na kunikaribisha kuishi kwake. Nilipata kazi ya mikono na nikakusanya fedha za kusomea kozi ya ufundi wa vifaa vya kielektroniki, kisha nikafungua duka la kutengeneza simu.

Nilisoma Biblia na nikatambua kwamba nilihitaji kuwaeleza wengine kuhusu uhuru mpya nilioupata ndani ya Kristo. Nikaanza kwenda katika vijiji vya mbali na vilivyojificha ili kuhubiri Injili.

Mwaka 2018, nilihisi Bwana ananiita kwenda kijiji cha Tanganyika. Hakukuwa na dini yoyote, wala kanisa au msikiti, bali kulikuwa na uchawi mwingi na ulevi. Nilihudumu huko kwa miaka miwili nikihubiri Injili, hadi kanisa likaanza kukua.

Baadaye nilihudhuria shule ya umishenari kwa mwaka mmoja huko Mombasa.

Soma simulizi kamili kwa kiingereza hapa: