“Ilikaribia Niwe Padri” – nyakati za wamishenari

Victor Bajah: Kutoka Nigeria hadi Jamhuri ya Kidemokrasia ya Kongo

Nilipokuwa nikikua, nilijiita Mkristo kwa sababu tulikuwa tukienda kanisani. Nilikuwa mhudumu wa madhabahuni na nilitamani kuwa Padri wa Kanisa Katoliki. Lakini kulikuwa na kitu kilichokuwa hakipo sawa au kilichokosekana katika malezi yangu ya Kikristo. Nilimwomba Mungu auponye ule upweke uliokuwa ndani ya moyo wangu.

Nilihama kutoka kanisa moja la Kipentekoste hadi jingine nikitafuta utimilifu wa moyo, lakini sikupata nilichokuwa nikikitafuta. Siku moja, mtu fulani alinishirikisha ujumbe kutoka katika Injili ya Yohana kwa mtazamo kuhusu Maandiko ambao sikuwa nimewahi kuuona hapo awali.

Ndipo nikatambua kwamba nilikuwa mwenye dhambi na nilihitaji Mwokozi. Ghafla, upweke uliokuwa ndani yangu ukaondoka. Nikawa na furaha tena, na hata nikapatanishwa na baba yangu.

Upendo na shauku yangu kwa ajili ya umishenari vilichochewa nilipokuwa nimehitimu masomo ya Uandishi wa Habari na Mawasiliano. Nilijiunga na jarida la Christian and Missionary Alliance. Niliposoma simulizi kuhusu makundi ya watu ambayo hayajafikiwa na Injili, nilihisi nikisukumwa kufanya jambo fulani.

Jambo moja nililojifunza kupitia jarida la Alliance Life lilikuwa kuhusu uinjilisti wa nyumba kwa nyumba. Nilianza kufanya hivyo.

Baada ya miaka kadhaa ya kupinga wazo hilo, hatimaye nilienda seminari na kusomea Shahada ya Uzamili katika Theolojia ya Kimfumo na Sera za Umma. Nilijiunga na Fellowship of Christian Students na nikapata mafunzo kupitia BSF kwa muda wa miaka saba, jambo lililonipa msingi niliouhitaji kwa ajili ya huduma ya umishenari.

Sasa mimi ni mmishenari ninayehusika katika huduma za umishenari za muda mfupi, pamoja na kuwafundisha wachungaji Theolojia ya Kimfumo, Theolojia ya Kichungaji, na Umishenari.

Shirika langu, Grace for the Heart of Africa, limewafundisha zaidi ya wachungaji 500 katika Jamhuri ya Kidemokrasia ya Kongo tangu mwaka 2018.

Soma simulizi yake kwa kiingereza https://afrigo.org/story…/missionary-profile-victor-bajah/